Asia Miles VS Avios
每日都有人拗，Asia Miles定Avios好？不如拆開比一比！
ROUND 1 換機票
第一樣最緊要，可以換到咩機票先？兩間都係One World
Avios：One World 加愛爾蘭航空、阿拉斯加航空
AM：One World 加中國國航、曼谷航空、德國漢莎、新西蘭航空
AM最多人唔滿意地方係難換機票，買就有換就成日都冇。咁代唔代表Avios易換啲？好可惜唔係，尤其飛日韓，換國泰機票比AM更難，除非你飛歐洲為主啦，否則現階段都要睇AM面色，呢方面係AM稍為佔優。
ROUND 2 邊個易儲？
如果計信用卡儲里數，香港嚟講AM會方便啲。一來大部分主要信用卡都儲到，二來優惠亦多。
儲Avios信用卡主要都係大新BA、Citi、DBS、AE白金，其實都唔差，唔同嘅基本消費項目都有覆蓋，不過就少咗匯豐呢啲強勢類別卡，除非你有卓越理財戶口。
咁Avios係咪輸晒呢？
未！Avios仲有兩大殺著：
1.有家庭帳戶計劃，可以一家人一齊儲，變相縮短換機票時間。
2.里數理論上冇限期，AM里數有3年有效期，Avios都係，不過只要戶口有里數入帳，就可以重新計算36個月有效期。亦即係如果Keep住有流動嘅話，就永遠都唔會過期，基本上有簽卡就有入帳，可以放心慢慢儲。
Avios仲有Mileslife、Agoda等途徑幫補吓，雖然AM揸張東亞Flyer World本地已經$5/里，但加加埋埋Avios都有能力同AM打個和。若單純驚唔易儲而放棄Avios的話，可以話你知，放心去馬啦。
ROUND 3 換機票煩唔煩？
好喇當你已經儲夠里數，又度好晒行程，到實際做嘢嗰Part，究竟要點換呢？煩唔煩㗎？
先講AM，一個字：煩！但佢嘅煩唔多唔少係因為玩法多，Stopover, Transfer, Open-Jaw都得。問題係Website同APP只換到直航點對點機票，要玩多目的地，一係上網填表等人覆，等唔切就要打Hotline換。
Avios就調返轉，冇咁多嘢玩，一個網換到晒，方便好多，你想打Hotline反而要收錢添呀！
ROUND 4 邊個抵？
經常有人話Avios抵啲，有個朵叫短途王喎，到底係咪真呢？
以香港飛台北經濟艙為例，Asia Miles來回15,000里，而Avios來回就只係9,000里，即係攞住30,000里，Asia Miles可以換來回台北2次，而Avios可以換到3次。而台北呢個例子亦都適用於河內、峴港、三亞、海口、長沙、廈門。
而至於日本，Asia Miles改咗新制後，Avios嘅優勢已經被縮窄，兩者大部份航點所需里數都係20,000里。商務艙就Avios 40,000里，AM 50,000里。不過如果換沖繩嘅話，Asia Miles來回要20,000里（經濟），而Avios就15,000里搞掂。
以前比較過嘅馬爾代夫，Asia Miles來回要44,000里，而Avios換就只係要25,000里，足足平三分一有多。
中長途情況就逆轉，例如飛洛杉磯：
Avios 經濟70,000里，商務210,000里
AM 經濟60,000里，商務140,000里。
所以要睇自己飛行習慣，咁一般香港人飛短途多，個人覺得呢ROUND可以當Avios贏嘅。
最後賽果
經過4 ROUND搏鬥，係時候睇睇最後結果！
第1 ROUND 換機票
其實兩間都難換，但因為靈活賞同隨心賞，AM硬係多啲位，雖然貴啲但起碼有得換，呢ROUND AM贏！
第2 ROUND 儲里數難度
AM多卡多優惠，AVIOS可以全家一齊儲同埋里數無限期，打個和。
第3 ROUND 鬥手續
AM郁吓都要打電話，唔似Avios上網搞掂快靚正，Avios贏。
第4 ROUND 鬥抵
兩者其實好接近，Avios短途依然贏晒，中途AM上力，長途反勝。計返香港人飛行習慣，一般嚟講都係短途為主，Avios贏個馬鼻。
最後Avios以兩勝一和僅勝AM！
不過咁，每人需求唔同，你絕對唔需要同意。
而且有樣嘢好重要，就係AM改制後，冇錯係拉近咗短途同Avios嘅距離，不過就搞到啲機位難換到嘔，里數實際價值降低（儲到換唔到），亦直接令現金回贈抬頭，齊齊攬炒，其實唔係好事。
