桃園機場捷運 台北車站預辦登機及託運行李介紹

台北桃園機場嘅預辦登機服務都開放使用咗一段時間,唔知大家又用過未呢?今次就會同大家介紹預辦登機嘅過程,只需幾個簡單步驟就即可完成,以後就唔洗再拎住行李到桃園機場咁麻煩啦!

可預辦登機航空公司

預辦登機服務並非每間航空公司都可以用到,暫時只開放予以下航空公司:

  • 中華航空、華信航空
  • 長榮航空、立榮航空
  • 國泰航空
  • 港龍航空
  • AirAsia(D7、AK、Z2、FD)

具人工櫃台之航空公司

  • 中華航空、華信航空(人工櫃台服務時間為06:00~18:30)
  • 長榮航空、立榮航空(人工櫃台服務時間為06:00~19:00)

如果託運行李裡包含紙箱、雨傘、背包、嬰兒車嘅話,由於呢啲行李都要使用人工櫃台先託運到,所以搭國泰、港龍同AirAsia嘅話就要去番機場辦理。

服務地點

台北車站桃園機場捷運B1層

服務時間

06:00~21:30(只限辦理當日航班,飛機起飛前三小時停止辦理)

不適用情況

  • 年齡12歲以下單獨旅行兒童
  • 團體
  • 攜帶寵物
  • 攜帶超大超長行李
  • 飛加拿大航班行李

流程

第一步首先到台北車站桃園機場捷運B1層,進入桃園機場捷運範圍之後,沿路會有路牌指示預辦登機嘅位置。注意就算唔搭桃園捷運都可以用呢項服務架!

預辦登機服務總共有三個選擇,分別係網上Check-In、自助Check-In同埋人工櫃台Check-In。而國泰、港龍同埋AirAsia係無人工櫃台Check-In,所以如果無事先係網上Check-In嘅話就要用自助報到機辦理。

自助報到機,只要輸入簡單資料再掃描Passport就完成登機,出嚟嘅登機證係軟紙,我個人就比較鍾意傳統硬紙個隻。

如果使用網上Check-In同自助Check-In嘅話,只要前往自助託運後放上行李,就可以開始託運行李流程,而格離會有專人傍住所以唔洗擔心唔識用。完成自助託運行李之後拎埋行李收據就可以前往後方等候過X光。

如果見到行李過完X光無問題嘅話就完成整個過程可以離開啦!唔肯定件行李係咪自己嘅話可以拎行李收據去查詢機到掃描,佢會話你知件行李過咗X光機未。

總結

桃園機場捷運嘅預辦登機服務非常方便,前後不足五分鐘就完成託運行李過程,而且免去旅程最後一日而又未夠鐘到機場,要將行李箱寄存係Locker或者酒店嘅問題。如果大家以後有機會到台北嘅話,不妨使用呢項快捷又方便嘅服務。

 

You may also like...