【貴賓室介紹】香港國際機場環亞機場貴賓室(鄰近60號閘口) Plaza Premium Lounge In Hong Kong International Airport(Near Gate 60)

60號Lounge分開咗兩個Area，呢邊喺飲需要額外付費嘅Lavazza咖啡，所以長期都無乜人

Lavazza咖啡櫃台，由於無乜客嘅關係所以Staff亦都好少出現。

而另一邊就係大家主要會用到嘅自助餐飲區域，今次Plaza Premium Lounge用咗批同以往唔同嘅傢俱款式，都可以話係注目點之一。

鍾意以往40號Lounge開揚感覺嘅朋友可以選擇出面嘅位置，部份座位同樣可以望到飛機坪。雖然整個Lounge空間唔係話好大，不過而家總共有3間Lounge做分流，所以人流都唔係好多。

自助飲料方面今次Plaza Premium Lounge就改用汽水機代替以往嘅大雪櫃，對於想拎飲料上機嘅乘客嚟講係個小扣分位，不過減少紙包／罐裝飲包對環境嚟講就絕對係件好事。

另一邊亦都有兩部自助果汁機以及啤酒供應，仲有Now新聞台睇添！

沙律吧，同以往嘅Gate 40比算係進步唔少，多咗唔少蔬菜選擇，另外仲有乳酪提供添。

熟食-蘋果批&椰撻

講到熟食方面，今次新Lounge真係幾出色，好似眼前嘅法式西多士咁，好味嘅程度絕對拍得住出面餐廳，係呢個Lounge最推薦嘅美食。

同以往唔同，呢個Lounge嘅即點即煮區喺落餐後會派發感應器，煮完再通知取餐，絕對係香港Plaza Premium Lounge嘅一個大進步。早餐時段提供四款即點即煮膳食，PPL嘅王牌美食魚蛋粉固然之有，另外連Poached Egg都有就有啲驚喜。

今次除咗除咗腐皮湯麵之外，其他三項都有試到。Penne Arrabbiata可以話喺三項之中最普通，味道不過不失，不過影相打卡唔錯。

而招牌魚蛋粉味道就同以往相約，未試過嘅不妨一試。

Poached Egg可以話係早餐之中最吸引嘅即點選擇，擺盤美觀，雖然略嫌塊包硬咗少少，但絕對係呢個Lounge嘅必試美食之一。另外Lounge中午至晚上會提供著名嘅叉燒飯，今次朝早去就享受唔到，有機會再同大家分享。