從港航貴賓室到金鵬里數
貴賓室最緊要就係唔好咁多貴賓
因為好少搭港航機，所以從來未入過港航貴賓室，啱啱周末坐港航去個快閃trip。晨雞咁早就入咗機場，Check-in完，免費雜誌都攞埋，仲未上得機。咁不如入lounge食個麵飲杯嘢，等時間過啦。
以平民機場貴賓室嚟講，香港得環亞同港航兩大陣營，環亞呢就冇乜好感，但唔會阻止人去，佢出名魚蛋粉同人多。
試試上年開嘅香港航空邀堂，本身曬張CCB Fly Away卡，或者ICBC香港航空Visa卡就免費入到。今次冇帶在身，但之前用ICBC MasterCard登記咗會籍，用龍騰出行APP，一年有6次Quota入去。
去到唔洗排隊，開APP，Scan QR Code，對一對登機證就入得。入到去人少少，對我嚟講已經合格！其他都係Bonus。
食物選擇okay啦，有雞蛋仔、喇沙、點心，趕時間嘅可以拎件三文治加支水即閃，唔趕都可以靜靜哋飲杯嘢食個沙律。貴賓室最緊要唔好咁多貴賓，似番個人咁等上機就夠㗎喇。
金鵬好鬼貴
啱啱個短trip賺到一兩千金鵬積分，梗係順手望下值唔值得儲落去。睇番啲機，除咗大陸，近嘅熱門地方換到日韓台曼谷，遠嘅都有洛杉磯、三藩市、溫哥華，但論航點始終輸AM同Avios幾萬條街。
抵唔抵換？
搵埋AM同Avios比一比，原來金鵬而家做緊兌換優惠，台北來回15,000分。有優惠都只係同AM打成平手，但Avios 9,000里連尾燈都望唔到。
大阪、首爾、東京呢？
盛惠30,000金鵬積分，同AM舊價一樣咁貴！人哋AM同Avios 20,000里，真係把鬼。
遠程去溫哥華，金鵬54,000分威返次，AM同Avios都要60,000里。
暫時輸到PK，不過佢唔係冇優點嘅。
金鵬好鬼貴 但係佢有位！
金鵬點儲？
搭飛機同儲信用卡積分係最大路嘅方法，香港出發就坐港航機賺分啦，唔同艙位有唔同積分。
信用卡方面，市面上本來得兩張儲到金鵬分：
CCB Fly Away卡（本地$6/FWC，海外$4/FWC）
ICBC香港航空Visa卡（$8/FWC）
都唔算易儲。但而家仲會有張中銀香港航空Visa，分白金同Visa Signature，低至本地$5/FWC，海外同網上$3/FWC。
金鵬最正係出機票易，機位充足。唔似AM同Avios，儲到分都換唔到飛，成日得個儲字，仲要驚AM過期。
另外仲有個方法可以平啲換，建行張卡其實有個不定時5折兌換優惠，可以半價出飛去指定地方。
上次來回台北11,000
札幌19,000
洛杉磯32,500
商務艙飛札幌29,000！AM要50,000㗎。
都係超值嘅。中銀嗰張都話有年度5折，唔知點年度法，又唔知點5折法，到時再諗。
你話要主力儲金鵬，又好似未去到抵，但儲埋一炮過5折出飛（有條件地），仲要多啲機位，港航機又唔差（個人感覺），其實都有佢嘅價值嘅。
