ANA里數計畫

香港地要儲里數,本來首推亞洲萬里通,最多途徑換又最多優惠。問題係換飛難,難到一個點,一係早一年換定,一係等佢突然嘔番啲飛出嚟。你份工可以快閃咪有用囉,我份工閃唔到咪儲空氣囉。同為One World嘅Avios都一樣受到CX所害,喊出嚟。

其他主要里數呢?
港航而家我推介你都講粗口鬧我啦,我呢啲孝子唔做呢啲嘢,諗嚟諗去得番ANA叫做換到又合理少少。

ANA基地位於東京、大阪,而且日本國內航線幾乎覆蓋成個日本。北至北海道,南至沖繩,去日本深度遊啱晒。仲有個賣點就係,17,000里換到香港日本來回機票,仲少過AM。

ANA嘅Partner都好強大,身為星空聯盟嘅一員,長榮、泰航、新航、韓亞都係盟友,儲ANA里數等於儲埋佢哋。除咗亞洲區,歐美機票都有聯合、漢莎,其實唔錯。

 

ANA里數點儲?

全香港只得一張信用卡儲到ANA,就係大新ANA World萬事達卡。本地海外簽乜嘢都係得$8/里,點用得唔落手啫?係迎新吸引啲,簽$12,500有13,100里,另外每出多張附屬卡有多2,000里,出兩張畀屋企人就有17,100里,剛剛夠換張淡季日本來回機票。有樣嘢好,攞住張卡搭ANA,可以喺ANA商務艙櫃位Check In

但都係嗰個問題,$8/里!除迎新外幾乎冇其他推廣,想儲快少少都冇計!所以我之前話ANA易換難儲,獨市你吹佢唔脹,你話如果之前中銀玩聯營,唔係同港航而係同ANA,咁就Perfect池!

信用卡以外,Mileslife亦都可以綁定ANA會籍,簽到、行路、食飯、訂旅遊產品,通通都賺到ANA里數,但全部都係有限數,行到你斷腳都未有得飛。

搭ANA機都儲到ANA里數,舉例香港飛成田經濟艙來回,最少會賺到30%里數(比率睇艙等),計埋大約1092里。

ANA好似Avios咁可以成家人一齊儲,因為有家庭帳戶計劃,連埋自己最多8個人。但過河濕腳,開家庭帳戶會收手續費(1000里呀!)同埋好學唔學,學AM咁里數3年會過期,真係分分皆辛苦。

 

ANA兌換規則

換嘢當然有規有矩啦,咁ANA換自己航班都有幾條基本嘅兌換rules。首先除咗日本國內航線,其他只可以換來回飛,冇單程機票換。

日本出發嘅行程唔可以Stopover,而其他地方出發就可以有最多1次Stopover。喺日本境內去程同回程各有最多2次轉機,留意返Stopover係當一次轉機㗎。

咁點知A點去B點要幾多里數呢?
ANA同AM唔同,唔係計飛行距離,而係將全世界分為10個區域。咁香港屬於區域3(亞洲1),區域1就包括成個日本,所以香港無論去日本邊個城市都係一樣里數。

另外ANA將每年分為淡季、正常、旺季,唔同航線個日期都會唔同,3個時間去同一個地方所需里數未必一樣。例如香港去日本,淡季17,000里,正常20,000里,旺季23,000里。至於幾時係淡旺季?上官網睇就有。

 

17000里玩轉日本

係時候講吓用ANA里數可以點玩法,搭ANA梗係要去日本啦!
香港 => 東京 => 札幌
函館 => 東京 => 香港
去北海道AM咪好難換嘅,但係搭ANA就多好多航班揀喇,不過要停一停東京,可以札幌玩完落函館,中間程JR就要另外安排喇。最後都係經東京返香港,轉兩次機加一個open-jaw,埋單淡季都係17,000里啫。

其實呢條飛係可以無限延伸其他組合,只要將札幌同函館改做其他日本機場,因為Open-jaw嘅兩個機場一定要喺同一個區域,而呢個區包左成個日本,例如轉做名古屋同大阪,從名古屋開始、玩到下呂、白川、高山、金澤到大阪,再經東京返歸又得啫,所需里數都係一樣㗎。

 

23,000里 香港 > 日本 > 關島

之前講過ANA都有好多Partner,同屬星空聯盟嘅聯合航空係其中一個。用佢嘅航線就可以砌到個日本關島嘅trip喇,仲只係需要23,000里添。

香港 => 東京 => 任何日本城市 (ANA)
任何日本城市 => 東京 => 關島 (ANA+UA)
關島 => 香港 (UA)
即是比上次個日本多6,000里就可以去埋關島!

因為香港同關島都係屬於區域3 (唔好問我點解),所以呢條飛可以視為 區域3=>區域1。由於有兩程機係UA,咁就要睇埋夥伴航空公司嘅里數對照表喇!

官網有對照表:
https://www.ana.co.jp/…/amc/refer…/tukau/award/tk/usage.html

 

60,000里 美西加夏威夷來回

用ANA里數點止玩日本同亞洲區?去美加都抵換㗎!搭ANA機淡季只係45,000里啫,不過要去東京轉一轉機。就算換伙伴機(UA)去到東岸都係60,000里,比AM(84,000里)同Avios(70,000里)平唔少。

換伙伴機嘅好處係可以加個Stopover,只要呢個中途站唔遠過目的地,即係所需里數少一啲就可以。
香港 => 任何美加城市
任何美加城市 => ? => 香港
個問號可以係區域 1,2,3,5,6,北美洲、夏威夷、日韓台等等有航線嘅國家,60,000里都攪得掂喇。

根據兌換規則回程仲可以加個轉機添
例如變成咁都得:
美國西岸 => 夏威夷 => 關島 => 香港
可以Stopover埋夏威夷再經關島轉機返香港

 

飛日本換經濟定商務?

前三個實例全部都係講換經濟艙,其實ANA里數仲可以換到business同頭等,不過都要有得換先得。香港出發坐ANA機剩係去到日本,留意返呢啲航班係冇頭等、得商務啫。

有得換又代唔代表抵換呢?
以下搵咗香港飛東京嚟比較,睇睇邊隻艙抵換啲,首先香港飛東京所需里數係:

經濟艙:
淡季 17,000里
正常 20,000里
旺季 23,000里
商務艙:
淡季 35,000里
正常 40,000里
旺季 43,000里

而買機票未連稅嘅大約價錢就係:

經濟艙:$3,450/$6,160(旺季)
商務艙:$15,950

換商務艙只係多一倍里數,但係張機票係貴兩倍以上〝個結論係換商務艙每一里換算價錢低啲,所以係抵啲。經濟艙尤其係非旺季雖然所需里數最少,但其實最唔抵換。

 

長途換咩艙抵?

咁ANA里數換長程機又咩艙抵呢?
之前講過因為ANA係屬於星空聯盟,所以可以用ANA里數換星空聯盟成員嘅航班,今次我搵咗聯合航空香港飛三藩市嘅航班嚟比較,未連稅機票嘅價錢大約就係:

經濟艙:$5,610(4月)-$10,980(8月)
商務艙:$44,270
頭等艙:$93,830

而兌換聯合航班所需要嘅里數,係要以伙伴表格計算,所需里數如下:

經濟艙:60,000里
商務艙:95,000里
頭等艙:180,000里

計吓數先,睇吓每一里值幾錢:

經濟艙:$0.09/里(4月淡季)-$0.18/里(8月旺季)
商務艙:$0.47/里
頭等艙:$0.52/里

可以見到,頭等艙每一里換算價錢最抵,商務艙都好接近。如果里數充足,都係要嚟換商務或頭等好啲,始終ANA難儲。但若里數唔多又想直飛美國,咁就挭係有乜換乜啦!

You may also like...